ಸಂಬಂಧಗಳು ಆರೋಗ್ಯಕರವಾಗಿ ಅರಳಲಿ, ಉಳಿಯಲಿ, ಬೆಳೆಯಲಿ ಎಂಬ ಆಶಯದಿಂದ: ನಟರಾಜು ಎಸ್. ಎಂ.

ಒಬ್ಬ ವ್ಯಕ್ತಿಗೆ ಮದುವೆಯಾಗಿತ್ತು. ಎದೆ ಎತ್ತರಕ್ಕೆ ಬೆಳೆದ ಮಗನೂ ಇದ್ದ. ನೌಕರಿಯ ನಿಮಿತ್ತ ಬೇರೊಂದು ಊರಿಗೆ ವರ್ಗಾವಣೆಯಾಗಿ ಬರುವಾಗ ಹೆಂಡತಿ ಮಕ್ಕಳನ್ನು ತನ್ನೂರಿನಲ್ಲೇ ಬಿಟ್ಟು ಬಂದಿದ್ದ. ಹೊಸ ಊರು, ಹೊಸ ಆಫೀಸ್, ಹೊಸ ಜನಗಳ ನಡುವೆ ಒಂದು ಹುಡುಗಿ ಹೇಗೋ ಈ ಸಂಸಾರಸ್ಥನ ಕಣ್ಣಿಗೆ ಬಿದ್ದಿದ್ದಳು. ಆತನ ವಯಸ್ಸು ಸುಮಾರು 46. ಆಕೆಗೆ ಕೇವಲ 26 ವರ್ಷ ವಯಸ್ಸು. ಒಂದೇ ಆಫೀಸಿನಲ್ಲಿ ಇಬ್ಬರು ನೌಕರರಾಗಿದ್ದ ಕಾರಣ ಇಬ್ಬರಿಗೂ ಸ್ನೇಹವಾಯಿತು. ಸ್ನೇಹ ಪ್ರೇಮಕ್ಕೆ ತಿರುಗಲು ಹೆಚ್ಚು ಸಮಯ ಬೇಕಾಗಿರಲಿಲ್ಲ. ಇವರಿಬ್ಬರ ಪ್ರೇಮದ ಕತೆ ಆತನ ಹೆಂಡತಿಯ ಕಿವಿಗೆ ಬಿದ್ದಿದ್ದೇ ಆಕೆ ತನ್ನ ಗಂಡನ ಆಫೀಸಿಗೆ ಬಂದು ರಂಪ ರಾಮಾಯಣ ಮಾಡಿಯಾಗಿತ್ತು. ಒಂದೆರಡು ಬಾರಿ ಈ ಜಗಳ ಪೋಲೀಸ್ ಸ್ಟೇಷನ್ನಿನ ಮೆಟ್ಟಿಲು ಸಹ ಹತ್ತಿತ್ತು ಎನ್ನಬಹುದು.

ಇಷ್ಟೆಲ್ಲಾ ನಡೆದರೂ ಆ ಇಬ್ಬರು ಪ್ರೇಮಿಗಳ ನಡುವೆ ಪ್ರೇಮ ನಿರಾತಂಕವಾಗಿ ಸಾಗಿತ್ತು. ಈ ರಂಪ ರಾಮಾಯಣ ಪ್ರೇಮಾಯಣಗಳು ಆಫೀಸಿಗೆ ಶೋಭೆಯಲ್ಲ ಎಂದು ಭಾವಿಸಿದ ಆ ಆಫೀಸಿನ ಅಧಿಕಾರಿಗಳು ಆ ವ್ಯಕ್ತಿಯನ್ನು ಬೇರೊಂದು ಊರಿಗೆ ವರ್ಗಾಹಿಸಲು ಎಲ್ಲಾ ಸಿದ್ದತೆಗಳನ್ನು ಮಾಡಿದ್ದರು. ವರ್ಗಾವಣೆಯ ಪತ್ರ ಸಹ ಆತನ ಕೈ ಸೇರಿತ್ತು. ನಾಳೆ ಅಫಿಸಿಯಲ್ಲಿ ತಾನಿರುವ ಊರಿನಿಂದ ಬೇರೊಂದು ಊರಿಗೆ ಹೋಗುತ್ತಿರುವ ಖುಷಿ ಆತನ ಮುಖದಲ್ಲಿತ್ತು. ಲಗ್ಗೇಜ್ ಎಲ್ಲಾ ಪ್ಯಾಕ್ ಮಾಡಿ ಬೇರೊಂದು ಊರಿಗೆ ಹೋಗಿ ಅಲ್ಲಿ ಡ್ಯೂಟಿಗೆ ರಿಪೋರ್ಟ್ ಮಾಡಿಕೊಳ್ಳುವ ಖುಷಿಯಲ್ಲಿ ಈ ವ್ಯಕ್ತಿ ಇದ್ದ. ಅಲ್ಲಿ ಹೋಗಿ ಡ್ಯೂಟಿಗೆ ರಿಪೋರ್ಟ್ ಮಾಡಿಕೊಳ್ಳುವ ಮೊದಲು ಬಿಟ್ಟು ಬಂದಿದ್ದ ಹೆಂಡತಿ ಮಕ್ಕಳ ಜೊತೆ ದೂರದ ಕಾಶ್ಮೀರಕ್ಕೆ ಹೋಗಿ ಬರುವ ಪ್ಲಾನ್ ಸಹ ಆತ ಮಾಡಿಯಾಗಿತ್ತು.

ಆತ ಆ ಆಫೀಸಿನ್ನು ಬಿಟ್ಟು ಹೋಗುವ ಸುದ್ದಿ ಸ್ವಾಭಾವಿಕವಾಗಿ ಆತನ ಪ್ರೇಯಸಿಯು ಗರಂ ಆಗುವಂತೆ ಮಾಡಿತ್ತು. ಮದುವೆಯಾಗದ ಹೆಣ್ಣು ಸಂಸಾರಸ್ಥನನ್ನು ಯಾಕಾದರು ಪ್ರೀತಿಸಿದಳೋ ದೇವರೆ ಬಲ್ಲ. ಆಕೆ ಬರೀ ಗರಂ ಆಗಲಿಲ್ಲ ಆ ರಾತ್ರಿ ಲಗೇಜ್ ಪ್ಯಾಕ್ ಮಾಡುವುದರಲ್ಲಿ ಬ್ಯುಸಿ ಇದ್ದವನ ರೂಮಿಗೆ ಬಂದವಳೇ ಅವನಿಲ್ಲದಿದ್ದರೆ ತಾನು ಸಾಯುವೆ ಎಂಬಂತಹ ಮಾತನಾಡಿದ್ದಳು. ಮಾತು ಜಗಳಕ್ಕೆ ತಿರುಗಿ ಜಗಳ ಸಹಿಸಲಸಾಧ್ಯವಾದಾಗ ಆತ ಸೀದಾ ಪೋಲೀಸ್ ಸ್ಟೇಷನ್ ಗೆ ಹೋಗಿ “ಈ ಹುಡುಗಿ ತನ್ನ ಹೆಸರನ್ನು ಬರೆದಿಟ್ಟು ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ” ಎಂದು ಹೆದರಿಸುತ್ತಿದ್ದಾಳೆ ಎಂದು ಕಂಪ್ಲೇಂಟ್ ನೀಡಿಬಿಟ್ಟ. ಅವನನ್ನು ಹಿಂಬಾಲಿಸುತ್ತಲೇ ಬಂದಿದ್ದ ಆಕೆ “ಈತ ತನಗೆ ಮಾನಭಂಗ ಮಾಡಿದ” ಎಂದು ಆಕೆಯೂ ಸಹ ಕಂಪ್ಲೇಂಟ್ ನೀಡಿಬಿಟ್ಟಳು.

ಅವಳ ಹೇಳಿಕೆಗೆ ಜಗಳ ಮಾಡುವಾಗ ಹರಿದ ಬಟ್ಟೆ ಪ್ರಾಥಮಿಕ ಸಾಕ್ಷಿಯಾಗಿತ್ತು. ಆ ರಾತ್ರಿ ಅವರಿಬ್ಬರನ್ನೂ ಪೋಲೀಸ್ ಠಾಣೆಯಲ್ಲೇ ಕುಳ್ಳರಿಸಿದ ಪೋಲೀಸರು ಆಕೆ ನೀಡಿದ ಕಂಪ್ಲೇಂಟ್ ನ ಆಧಾರದ ಮೇಲೆ ಬೆಳಿಗ್ಗೆ ಇಬ್ಬರನ್ನು ಕೋರ್ಟ್ ನಲ್ಲಿ ಹಾಜರುಪಡಿಸಿದರು. ನಂತರ ಮೆಡಿಕಲ್ ಚೆಕ್ ಅಪ್ ಸಹ ನಡೆದು ಹೋಯಿತು. ಹುಡುಗಿ ನೀಡಿದ ಸಾಕ್ಷಿ ಆಧಾರಗಳ ಮೇಲೆ ಆತ ತಪ್ಪಿತಸ್ಥನ ಸ್ಥಾನದಲ್ಲಿ ನಿಲ್ಲಬೇಕಾಯಿತು. ಮಾನಭಂಗ ಜಾಮೀನು ರಹಿತ ಕೇಸ್ ಆಗಿದ್ದುದರಿಂದ ಆತನನ್ನು ಸೀದಾ ಜೈಲಿಗೆ ಕಳುಹಿಸಲಾಯಿತು. ಆಕೆಯದು ಯಾವುದೇ ತಪ್ಪುಗಳಿಲ್ಲ ಎಂಬ ಕಾರಣಕ್ಕೆ ಆಕೆಯನ್ನು ಬಿಟ್ಟುಬಿಡಲಾಯಿತು. ಆಕೆ ಮಾರನೆಯ ದಿನದಿಂದಲೇ ತನ್ನ ಪಾಡಿಗೆ ತಾನು ಕೆಲಸಕ್ಕೆ ಹಾಜರಾಗಿದ್ದಳು.

ಜೈಲು ಸೇರಿದ ಗಂಡನ ನೋಡಲು ಆತನ ಹೆಂಡತಿ ಬಂದು ಆತನನ್ನು ಹೇಗಾದರು ಮಾಡಿ ಜೈಲಿನಲ್ಲಿ ಬಿಡುಗಡೆಯಾಗುವಂತೆ ಮಾಡಬೇಕು ಎಂದು ಹರ ಸಾಹಸ ಮಾಡುತ್ತಿದ್ದಳು. ಆತನ ತಪ್ಪುಗಳನ್ನು ಆಕೆ ಕ್ಷಮಿಸಿದ್ದಳಾ? ಗೊತ್ತಿಲ್ಲ. ಆಕೆಯ ಜಾಮೀನು ಕೊಡಿಸುವ ಪ್ರಯತ್ನಗಳು ಫೇಲ್ ಆಗಲು ಒಂದು ಕಾರಣವೂ ಇತ್ತು. ಆ ಕಾರಣ ಏನೆಂದರೆ ಆ ಹುಡುಗಿ ಆತನ ಜೊತೆಗಿನ ಅತ್ಯಂತ ಖಾಸಗಿ ಘಳಿಗೆಗಳನ್ನು ವಿಡಿಯೋ ಮಾಡಿ ಅವುಗಳನ್ನು ನ್ಯಾಯಾಧೀಶರ ಎದುರಿಗಿಟ್ಟಿದ್ದಳಂತೆ. ವಿಧಿಯಿಲ್ಲದೆ ಆತ ಒಂದಷ್ಟು ದಿನ ಜೈಲಿನಲ್ಲಿ ಕಳೆಯಲೇಬೇಕಿತ್ತು. ಜೈಲಿನಲ್ಲಿ ಒಂದೆರಡು ವಾರ ಕಳೆದ ಮೇಲೆ ಮೆಡಿಕಲ್ ಗ್ರೌಂಡ್ಸ್ ಆಧಾರದ ಮೇಲೆ ಆತನನ್ನು ಜೈಲಿನಿಂದ ಕರೆ ತಂದು ಆಸ್ಪತ್ರೆಯಲ್ಲಿರುವ ಸೆಲ್ ನಲ್ಲಿ ಚಿಕಿತ್ಸೆಗಾಗಿ ಇಡಲಾಗಿತ್ತು. ಅದೇ ಆಸ್ಪತ್ರೆಯಲ್ಲಿ ಉನ್ನತ ಅಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿದ್ದ ವ್ಯಕ್ತಿ ಆ ಆಸ್ಪತ್ರೆಯ ಕಿಟಕಿಗಳಿಲ್ಲದ ಸೊಳ್ಳೆಗಳೇ ತುಂಬಿದ ಕತ್ತಲ ಕೋಣೆಯೊಂದರಲ್ಲಿ ಆ ರೀತಿ ದಿನ ಕಳೆಯಬೇಕಾದುದು ವಿಪರ್ಯಾಸವೇ ಸರಿ.

ಜೈಲಿನಲ್ಲಿ ಇರಬೇಕಾದ ವ್ಯಕ್ತಿ ಆಸ್ಪತ್ರೆಯ ಸೆಲ್ ನಲ್ಲಾದರೂ ಒಂಚೂರು ನೆಮ್ಮದಿಯಾಗಿ ಇದ್ದನೇನೋ. ಆದರೆ ನೆಮ್ಮದಿ ಒಂದೆರಡು ದಿನಕ್ಕಿಂತ ಹೆಚ್ಚು ದಿನ ಉಳಿಯಲಿಲ್ಲ. ಯಾಕೆಂದರೆ, ಆಸ್ಪತ್ರೆಯ ಆ ಸೆಲ್ ನಲ್ಲಿ ತನ್ನನ್ನು ನೋಡಲು ಬಂದ ವ್ಯಕ್ತಿಯೊಬ್ಬನ ಮೊಬೈಲ್ ತೆಗೆದುಕೊಂಡು ಆ ಹುಡುಗಿಗೆ ಕರೆ ಮಾಡಿ “ನೀನು ಮಾಡಿದ್ದು ಸರಿಯಾ?” ಎಂದು ಕೇಳಿಬಿಟ್ಟಿದ್ದ. ಆ ಕರೆಯಿಂದ ಕೆಂಡಾಮಂಡಲವಾದ ಹುಡುಗಿ ಅದೇ ದಿನ ಆ ಮೊಬೈಲ್ ಸಮೇತ ಪೋಲೀಸ್ ಸ್ಟೇಷನ್ ಗೆ ಹೋಗಿ ಈ ನಂಬರ್ ನಿಂದ ನನಗೆ ಜೀವ ಬೆದರಿಕೆ ಬರುತ್ತಿದೆ ಎಂದು ಹೇಳಿ ಆಸ್ಪತ್ರೆಯ ಸೆಲ್ ನಿಂದ ತನ್ನ ಪ್ರಿಯಕರನನ್ನು ಮತ್ತೆ ಜೈಲಿಗೆ ಪೋಲೀಸರು ಹೊತ್ತೊಯ್ಯುವಂತೆ ಮಾಡಿದ್ದಳು.

ಒಬ್ಬ ಉನ್ನತ ಮಟ್ಟದ ಅಧಿಕಾರಿ ಹೀಗೆ ಯಾವುದೋ ಪ್ರೇಮದಲ್ಲಿ ಬಿದ್ದು ಜೈಲು ಪಾಲಾದುದು ವಿಪರ್ಯಾಸವೇನೋ ಸರಿ. ಆತನ ವೈವಾಹಿಕ ಜೀವನ ಅಷ್ಟು ಸುಖಕರವಾಗಿರಲಿಲ್ಲ ಎಂದು ಜನ ಮಾತನಾಡಿಕೊಳ್ಳುವಾಗ ಒಮ್ಮೆ ಆತನೇ ತನ್ನ ಸಂಸಾರದ ಕುರಿತು ಮಾತನಾಡಿದ್ದ. “ನನಗೆ ಮದುವೆಯಾಗಿ 16 ವರ್ಷವಾಯಿತು. ಹೆಂಡತಿ ತುಂಬಾ ಒಳ್ಳೆಯವಳು. ಆದರೆ ಯಾಕೋ ಆಕೆಗೂ ನನಗೂ ಆಗಿಬರಲಿಲ್ಲ. ಮಗನೊಬ್ಬ ಹುಟ್ಟಿದ ಖುಷಿ ಬಿಟ್ಟರೆ ವೈವಾಹಿಕ ಜೀವನ ಬೇಸರದಿಂದಲೇ ಕೂಡಿತ್ತು” ಎಂಬ ಆತನ ಮಾತು ಕೇಳಿದಾಗ ತನಗೆ ಸಿಗದೆ ಪ್ರೇಮವನ್ನು ಆತ ಆ ಹುಡುಗಿಯಲ್ಲಿ ಕಂಡುಕೊಳ್ಳಲು ಪ್ರಯತ್ನಿಸಿದ್ದ ಎನಿಸಿತು. “ಈ ಪ್ರಪಂಚದಲ್ಲಿ ವಿವಾಹದಾಚೆಗಿನ ಸಂಬಂಧಗಳು ಎಷ್ಟಿಲ್ಲ ಹೇಳಿ. ತನ್ನ ಪ್ರೇಯಸಿ ಮತ್ತು ಹೆಂಡತಿಯನ್ನು ಸರಿದೂಗಿಸಿಕೊಂಡು ಬದುಕುತ್ತಿರುವವರಿಗೇನು ಈ ಪ್ರಪಂಚದಲ್ಲಿ ಕಡಿಮೆಯೇ? ಈತನ ಅದೃಷ್ಟ ಚೆನ್ನಾಗಿರಲಿಲ್ಲ. ಮೂರ್ಖನಾದ ಅಷ್ಟೆ.” ಎಂಬಂತೆ ಜನ ತಲೆಗೆ ಒಂದೊಂದು ಮಾತನಾಡುವುದ ಕೇಳಿದಾಗಲೆಲ್ಲಾ ಹೌದಲ್ಲ ಪ್ರೇಮ ಮನುಷ್ಯನನ್ನು ಮೂರ್ಖನನ್ನಾಗಿ ಮಾಡುತ್ತದೆ ಎನಿಸಿತು.

ಮದುವೆಯಾಗದ ಒಂದು ಹುಡುಗಿ ತನ್ನ ಭವಿಷ್ಯದ ಕುರಿತು ಯಾವತ್ತೂ ಯಾಕೆ ಚಿಂತಿಸಲಿಲ್ಲ. ತನಗಿಂತ ವಯಸ್ಸಿನಲ್ಲಿ ತುಂಬಾ ಹಿರಿಯನಾದ ಸಂಸಾರಸ್ಥನೊಬ್ಬನ ಜೊತೆ ಸಂಬಂಧಕ್ಕೆ ಸುಮ್ಮನಾದರು ಯಾಕೆ ಬಿದ್ದಳು ಎಂದು ಯೋಚಿಸುತ್ತಾ ಕುಳಿತರೆ ಉತ್ತರಗಳು ಸಿಗುವುದಿಲ್ಲ. ಆದರೆ ಒಬ್ಬ ಮದುವೆಯಾದಾತ ಇಂತಹ ಪ್ರೇಮದಲ್ಲಿ ಯಾಕೆ ಬಿದ್ದ ಎಂದು ನನ್ನನ್ನು ನಾನೇ ಪ್ರಶ್ನಿಸುತ್ತಾ ಕುಳಿತಾಗ ಎಂದೋ ಎಲ್ಲೋ ಓದಿದ್ದ “ಎದೆಯ ಮೇಲಿಹಳು ತೊಡೆಗೆ ಬಾರಳು. ತೊಡೆಯ ಮೇಲಿಹಳು ಎದೆಗೆ ಬಾರಳು” ಎಂಬ ಸಾಲುಗಳು ನೆನಪಾಗುತ್ತವೆ. ಆ ಸಾಲಿನೊಳಗಿರುವ ಒಳ ಅರ್ಥಗಳು ಪ್ರೇಮ ಮತ್ತು ಕಾಮದ ಆಕರ್ಷಣೆಯ ಅವಾಂತರಗಳನ್ನು ಹೀಗೆ ನಮ್ಮೆದುರಿಗೆ ತೆರೆದಿಡುತ್ತವೆ ಎನ್ನಬಹುದು.

ಈ ತರಹ ವಿವಾಹೇತರ ಸಂಬಂಧಗಳ ಕಾರಣಕ್ಕೆ ಬದುಕು ಮೂರಾಬಟ್ಟೆ ಮಾಡಿಕೊಂಡವರ ಸಂಖ್ಯೆ ತುಂಬಾ ಇದೆ. ಹಲವು ಸಲ ಸೆಲೆಬ್ರಿಟಿಗಳ ಬದುಕಿನ ಇಂತಹ ಗೋಜಲುಗಳು ಮಾಧ್ಯಮಗಳ ಕೈಗೆ ಸಿಕ್ಕರೆ ಸೆಲೆಬ್ರೆಟಿಗಳ ಮಾನ ಮರ್ಯಾದೆ ಪ್ರತಿ ಮನೆಯ ಟಿವಿಗಳಲ್ಲಿ ಪೇಪರ್ ಗಳಲ್ಲಿ ಬಿತ್ತರವಾಗಿಬಿಡುತ್ತದೆ. ಟಿವಿ ನೋಡುವಾಗ ಪೇಪರ್ ನೋಡುವಾಗ ಸೆಲೆಬ್ರೆಟಿಗಳ ಬದುಕಿನಲ್ಲಿ ನಡೆಯುವ ಈ ತರಹದ ಘಟನೆಗಳು ಸಾಮಾನ್ಯರಿಗೆ ಪಾಠದಂತೆ ಎಂದಿಗೂ ಕಾಣುವುದಿಲ್ಲ. ಯಾಕೆಂದರೆ ಅವು ಕೇವಲ ಸುದ್ದಿಗಳಾಗಿರುತ್ತವೆ. ಆದರೆ ಎಲ್ಲಿಯೂ ಬಿತ್ತರವಾಗದ ಯಾರ್ ಯಾರ್ಯಾರದೋ ಬದುಕಿನ ಪುಟಗಳು ಹೀಗೆ ನಮ್ಮ ಕಣ್ಣಿಗೆ ನಿತ್ಯ ಬೀಳುತ್ತಲೇ ಇರುತ್ತವೆ. ನಿಜ ಹೇಳಬೇಕೆಂದರೆ ನಮಗೆ ಪಾಠಗಳನ್ನು ಕಲಿಸಿ ಕೊಡುವುದೇ ಇಂತಹ ನಾವೇ ಕಾಣುವ ನಮ್ಮ ನಡುವಿನ ಜನರ ಬದುಕಿನಲ್ಲಿ ನಡೆದ ನೈಜ ಘಟನೆಗಳು.

ಹೀಗೊಂದು ಸತ್ಯ ಘಟನೆಯಾದರಿಸಿದ ಬೇರೊಬ್ಬರ ಬದುಕನ್ನು ಇಲ್ಲಿ ಬರೆಯುವುದು ಎಷ್ಟು ಸಮಂಜಸವೋ ತಿಳಿಯದು. ಆದರೆ ಸಂಬಂಧಗಳು ಹೊಸ ರೂಪ ಪಡೆಯುವ ಭರದಲ್ಲಿ ಅರಳುವ ಬದಲು ಹಳಸುತ್ತಾ ಹೋಗಿ ಕ್ರಮೇಣ ಹೀಗೆ ಸಂಕೀರ್ಣವಾಗುತ್ತಿವೆ. ಯಾರ ಕಾರಣಕ್ಕೋ ಯಾವ ಕಾರಣಕ್ಕೋ ತಮ್ಮೊಳಗೆ ನೋವು ನುಂಗಿ ಬದುಕು ಸವೆಯುವ ಜನಗಳ ಸಂಖ್ಯೆ ನಮ್ಮ ನಡುವೆ ಹೆಚ್ಚುತ್ತಾ ಹೋಗುತ್ತಿರುವ ಈ ದಿನಗಳಲ್ಲಿ ಈ ತರಹದ ಘಟನೆಗಳ ಕುರಿತು ಬರೆಯಬೇಕಾದ ಅವಶ್ಯಕತೆ ಇದೆ ಎನಿಸಿತು. ಆ ಕಾರಣಕ್ಕೆ ಈ ಲೇಖನ ಬರೆದೆ. ಅನ್ಯತಾ ಭಾವಿಸದಿರಿ.

ಪ್ರೀತಿ ಇರಲಿ

ಮತ್ತೆ ಸಿಗೋಣ

ನಿಮ್ಮ ಪ್ರೀತಿಯ

ನಟರಾಜು