ಮಕ್ಕಳ ಪದ್ಯಗಳು: ಹೃದಯಶಿವ

೧)ಶುಭೋದಯ 
__________________
ದಿನಾ ನಾನು ಶಾಲೆಗೆ 
ಹೋಗುವಂಥ ವೇಳೆಗೆ 
ಹಾದಿಬದಿಯ ಬೇಲಿಯು 
ಮುಡಿದು ನಿಂತ ಹೂವಿಗೆ 
ಹೇಳುವೆ ಶುಭೋದಯ

ಹೊಳೆದಂಡೆಯ ಬಂಡೆಗೆ 
ಒರಗಿನಿಂಥ ಜೊಂಡಿಗೆ 
ರೆಕ್ಕೆಗೆದರಿ ಹಾರುವ 
ಹಚ್ಚಹಸಿರು ಮಿಡತೆಗೆ 
ಹೇಳುವೆ ಶುಭೋದಯ

ಎತ್ತರೆದೆಳನೀರಿಗೆ 
ಹತ್ತುವಂಥ ಅಳಿಲಿಗೆ 
ಪುಟ್ಟ ಮೂರುಗೆರೆಗಳ  
ಅದರ ಮುದ್ದುಬೆನ್ನಿಗೆ
ಹೇಳುವೆ ಶುಭೋದಯ

ಹಾಲ್ದುಂಬಿದ ತೆನೆಗೆ
ಕೊಕ್ಕಿಡುವಾ ಹಕ್ಕಿಗೆ 
ತೊಟ್ಟಿಲಾಗಿ ತೂಗುವ 
ತಾಯಿಯಂಥ ಪೈರಿಗೆ 
ಹೇಳುವೆ ಶುಭೋದಯ 

ಬೆಳ್ಳಿಯಂಥ ಬೆಳಗಿಗೆ 
ಚಿನ್ನದಂಥ ಕಿರಣಕೆ 
ಬದುಕಿರುವ ತನಕವೂ 
ಬದುಕುಳಿಯುವ ಚಿತ್ರಕೆ 
ಹೇಳುವೆ ಶುಭೋದಯ

೨)ಗುಂಡನ ಕರು
_______________________
ಸಂತೆಗೆ ಹೋಗಿ ತಂದರು ಅಪ್ಪ 
ಸುಂದರವಾದ ಹಸುವನ್ನು
ಹಾಲನು ಕುಡಿದು ಬೆಣ್ಣೆಯ ತಿಂದು
ಬೆಳೆಯುವೆ ಎತ್ತರ ನಾನಿನ್ನು

ಹಬೆಯಾಡುವ ಬಿಸಿಬಿಸಿಯನ್ನಕ್ಕೆ
ಸುರಿವಳು ಅಮ್ಮ ಕೆನೆಮೊಸರು
ಬಿಸಿಬಿಸಿ ರುಚಿರುಚಿ ತುಪ್ಪವು ಇರಲು
ಮುಟ್ಟಬಹುದೆ ನಾ ಬಸ್ಸಾರು
 
ಮರೆಯುವುದುಂಟೆ ಕೊಟ್ಟಿಗೆ ತುಂಬ
ಕರುವಿನ ಚೇಷ್ಟೆ ಹಲವಾರು
ಅದರೆಂಜಲನೇ ಕುಡಿಯುವೆನಾನು
ಅಂದರೆ ನಾವು ಸೋದರರು
 
ತೋಟಕೆ ಹೋಗಿ ತರುವೆನು ದಿನವು
ಗರಿಗರಿ ಗರಿಕೆಯ ಚಿಗುರನ್ನು
ಕುಕ್ಕೆಗೆ ಹಾಕಿ ಕಟ್ಟುವೆ ಮೂತಿಗೆ
ನೆಕ್ಕದ ಹಾಗೆ ಮಣ್ಣನ್ನು
 
ಶಾಲೆಗೆ ದಿನವೂ ಹೋಗಲೆಬೇಕು
ಏನು ಮಾಡಲಿ ಬೇಜಾರು
ಕರುವನು ಸಂಗಡ ಕರೆದೊಯ್ದರೆ ನಾ
ಬೈದೇಬಿಟ್ಟರು ಟೀಚರ್ರು

೩)ಮಗಳಿಂದ ಪಾಠ 
_______________________
ನೋಡು ಮಗಳೇ ನೋಡು ಮಗಳೇ
ಗೋಲ್ಡು ಚೈನು ತಂದೆನು
ಥ್ಯಾಂಕ್ಯೂ ಪಪ್ಪಾ ಥಾಂಕ್ಯೂ ಪಪ್ಪಾ
ಎಷ್ಟು ಕೊಟ್ಟೆ ದುಡ್ಡನು

ಹತ್ತು ಸಾವ್ರ ಅಷ್ಟೇ ಮರಿ
ಯಾಕೆ ಅದರ ಟೆನ್ಷನು
ಸಂಬಳ ಇನ್ನು ಬರಲೇ ಇಲ್ಲ
ಹೇಗೆ ತಂದೆ ಚೈನನು

ಹೇಗೋ ತಂದೆ ನಿನಗೆ ಯಾಕೆ
ಹಾಕೋ ಕೊರಳಿಗಿದನ್ನು
ಹೇಳದಿದ್ರೆ ನಿನ್ನ ಜೊತೆ
ಮಾತು ಬಿಟ್ಟುಬಿಡುವೆನು

ಆಫೀಸಲ್ಲಿ ಗೆಳೆಯ ಕೊಟ್ಟ
ಕಾಸಿನಿಂದ ತಂದೆನು
ಸಾಲ ಮಾಡಿ ತಂದ ಒಡವೆ
ಖಂಡಿತ ನಾ ಒಲ್ಲೆನು

ಸಾಲವಲ್ಲ ಲಂಚದ ಹಣ
ಕ್ಷಮಿಸು ಮಗಳೇ ನನ್ನನು
ನಾಳೆ ಹೋಗಿ ಕೊಡಲೇಬೇಕು
ಅವರಿಗವರ ಹಣವನು

ಆಯ್ತು ಮಗಳೇ ಮುದ್ದುಮಗಳೇ
ಮತ್ತೆ ಹೀಗೆ ಮಾಡೆನು
ನನ್ನಪಪ್ಪಾಜಾಣಪಪ್ಪಾ
ಎಂದುಹೆಮ್ಮೆಪಡುವೆನು

*****