ಕವಿತೆಗಳು:ನವೀನ್ ಮಧುಗಿರಿ ಹಾಗೂ ಎನ್.ಕೃಷ್ಣಮೂರ್ತಿ

ಬೆಳಕಿನ ಹಾದಿಯೊಳು ನಡೆಯಬೇಕು

ಮೌನದಲೆ ಎಲ್ಲವನು ಏಕೆ ಹೇಳುವೆ ಗೆಳತಿ

ಮನಬಿಚ್ಚಿ ಹಾಡಿನ್ನು ಎದೆಯ ನೋವ

ಮೂಡಣದಿ ಆ ರವಿಯು ಕವಿಯಾಗಿ ಅನುದಿನವು

ಬುವಿಯೆದೆಗೆ ಬೆಳಗುನುಡಿ ಬರೆಯುತಿಹನು

ಜುಳುಜುಳನೆ ಹರಿಯುತಿಹ ಒಲುಮೆಯ ಕಣಿವೆಯೊಳು

ಕಣ್ಕಿರಣ ಮಿಟುಕಿಸುತ ಕರೆಯುತಿಹನು 

ಸಂಜೆಬಾನೊಳು ಚಂದ್ರ ಚುಕ್ಕಿಗಳ ಸನಿಹದೊಳು

ಪ್ರೇಮತಿಂಗಳ ಕವಿತೆ ಹಾಡುತಿಹನು

ವೃಂದಾವನದೊಳಗೆ ರಾಧೆ-ಕೃಷ್ಣರ ನಿತ್ಯ

ವೇಣುವೀಣೆಯ ಮಿಲನ ನೋಡುತಿಹನು 

ಒಲವದುವು ಕ್ಷಣಕ್ಷಣವು ನಿತ್ಯನೂತನ ಗೆಳತಿ

ರವಿ-ಬುವಿಯ ನೋಡಿ ನಾವ್ ಕಲಿಯಬೇಕು

ಹುಸಿಮುನಿಸ ಮರೆತಿನ್ನು ಹೊಸಕನಸ ಕೈಯಿಡಿದು

ಬೆಳಕಿನ ಹಾದಿಯೊಳು ನಡೆಯಬೇಕು 

ಮೌನದಲೆ ಎಲ್ಲವನು ಏಕೆ ಹೇಳುವೆ ಗೆಳತಿ

ಮನಬಿಚ್ಚಿ ಹಾಡಿನ್ನು ಎದೆಯ ನೋವ

             ~ಎನ್.ಕೃಷ್ಣಮೂರ್ತಿ, ಭದ್ರಾವತಿ