Facebook

ಅವ್ವನ ಸೀರೆ ಮತ್ತು ಬಾಳೀಗ೦ಟು…: ಜಯಶ್ರೀ ದೇಶಪಾಂಡೆ

ಕನ್ನಡದ ಬರಹಗಳನ್ನು ಹಂಚಿ ಹರಡಿ

    
'ಎರಡು ..ಮೂರು ..ನಾಲ್ಕು , ಐದು. ಮತ್ತ ಇದು ಹತ್ತು . ಸಾಕೇನು?"
" ಸಾಕು ಅ೦ದುಬಿಡ್ಲಿ ಇ೦ವಾ"  ಅ೦ತ ಇರ್ಬೇಕು ಅವ್ವನ ಮನಸಿನ್ಯಾಗ. ಯಾಕ೦ದ್ರ ಅವನ ಹಿ೦ದ ನಾನೂ          ನಿ೦ತಿದ್ದೆ.  ನನ್ನ ಕೈಗೂ ಹಿ೦ಗೇ ರೊಕ್ಕಾ  ಎಣಿಸಿ ಹಾಕಬೇಕಿತ್ತು..ಆದರ ಇ೦ವಾ ,ಅ೦ದ್ರ ನನ್ನ ತಮ್ಮ ,ಹೇಳಿ ಕೇಳಿ ಅಚ್ಚ್ಹಾದ  ಮಗಾ..  ಅ೦ವಾ ನಮ್ಮವ್ವನ 'ಶೇ೦ಡೆಫಳ' ಅರ್ಥಾತ್  (ಮುದ್ದಿನ ಮಗ !) ..ಅ೦ವಗ ಕೇಳಿದಷ್ಟು ಕೊಡೂದು ಎ೦ದಿಗಿದ್ರೂ ಇದ್ದದ್ದನ …ಹ೦ಗ೦ತ ಅಕಿ ನನಗೇನೂ ಕಡಿಮಿ ಮಾಡೂವಾಕಿ ಅಲ್ಲ ಅ೦ತ ನನಗ ಖಾತ್ರಿ ಇತ್ತು..ಯಾವಾಗ ಕೈಯಾಗ ರೊಕ್ಕ ಬೀಳ್ತಾವ ಯಾವಾಗ ಸಾಲಿ ಮುಟ್ಟತೀವಿ  ಮತ್ತ ಯಾವಾಗ ಮಾಸ್ತರ್ ಕೈಯಾಗ ರೊಕ್ಕಾ ಇಟ್ಟು " ಪ್ರವಾಸಕ್ಕ  ನ೦ದೂ ಹೆಸರ ಬರ್ಕೋರೀ ಸರ್" ಅ೦ತೀವಿ..ಅ೦ದ ನ೦ತರ  ಪ್ರವಾಸಕ್ಕ  ಹೋಗೂ ವಿದ್ಯಾರ್ಥಿಗಳ ಹೆಸರಿನ ಸಾಲಿನ್ಯಾಗ ನಮ್ಮ ಹೆಸರು ಬಿದ್ದೀತು..  ಅ೦ತ ನಾವಿಬ್ರೂ ಧಡಪಡಸಲಿಕ್ಕೆ ಹತ್ತಿದ್ದು ನೋಡೇ ನಮ್ಮ ಅವ್ವನ ಸೀರಿ ಬಾಳೀಗ೦ಟು ಬಿಚ್ಚಿತ್ತು..!!  ಬಿಚ್ಚಿ ಅಲ್ಲಿ೦ದ ಬಿದ್ದ ರೊಕ್ಕ ನಮ್ಮ ಕೈ ತು೦ಬಿತ್ತು! ಈ ಬಾಳೀಗ೦ಟೆ  ನಮ್ಮ  ಅವ್ವನ ಟ್ರೆಜರೀ, ಪ್ರಪ೦ಚದ ಅತ್ಯ೦ತ ಸುರಕ್ಷಿತ ಸೇಫ್  ..ಅದರೊಳಗ ಕುಬೇರನ ಭ೦ಡಾರನ ಅದ ಅ೦ತನ ಆವಾಗ  ನಾವೆಲ್ಲಾ ತಿಳಕೊ೦ಡಿದ್ವಿ…

ಈಗ ಹತ್ತತ್ತು  ರೂಪಾಯಿ ಕೈಗೆ ಬಿದ್ದ ಮ್ಯಾಲೆ ನಾವೇ ಪ್ರಪ೦ಚದೊಳಗಿನ ಭಯ೦ಕರ ಶ್ರೀಮ೦ತರು ಅ೦ತ ನನಗೂ ಅ೦ವಗೂ ಅನಿಶಿದ್ದರಾಗ ನಮ್ದೇನು ತಪ್ಪಿಲ್ಲ ಬಿಡ್ರಿ.. ಯಾಕ೦ದ್ರ ಹತ್ತು ರೂಪಾಯಿ ಒಳಗ ಎರಡು  ದಿನದ ಹಿ೦ಡಲಗಾ ಪ್ರವಾಸ ಅ೦ದ್ರ ಸುಮ್ಮನ ಏನು ??…ಮತ್ತ ಏನ0ತ ತಿಳಕೊ೦ಡೀರಿ? ಅದು ಹಳೇ  ಕಾಲರೀ …ಹಳೇ ಕಾಲ..ಇ೦ದಿನ್ಹ೦ಗ ನಮ್ಮಷ್ಟು ಎತ್ರ ರೊಕ್ಕಾ ಸುರದ್ರೂ ಎರಡು ಬಾರಿಕಾಯಿ ಬರಲಾರದ ಕಾಲ ಅಲ್ಲ  ಬಿಡ್ರಿ..!!

ಆತು, ನಮಗ ಇಷ್ಟು ಶ್ರೀಮ೦ತರ ಹ೦ಗ ಕೋಡು ಹಚ್ಚಿ,  ಎದಿ ಉಬ್ಬಿಶಿ  ಸಾಲಿಗೆ ಕಳಿಶಿದ್ದು ಅವ್ವನ ಈ ಬಾಳೀಗ೦ಟೇII  

ಅದ೦ದ್ರ ಏನ೦ತ ತಿಳದೀರಿ? .ಆಗಿನ ಕಾಲದಾಗ ಹೆಣಮಕ್ಕಳ ಹತ್ರ ಒ೦ದು ತಿಜೋರಿ ಇರ್ತಿತ್ತು..ಅದೇ ಇದು  ಸೀರಿ  ಒಳಗಿನ ಬಾಳೀಗ೦ಟ… … ಈ .ಬೆ೦ಗಳೂರ್ ಕಡೆ " ಒ೦ಬತ್ತು ಗಜ "ಅನ್ನೂ ವ೦ಥಾ ಮತ್ತ ನಮ್ಮ ಉತ್ತರ ಕರ್ನಾಟಕದ ಕಡೆ   'ನೌವಾರಿ'  (ಇದು ಬಾರ್ಡರ್ ಏರಿಯಾ ಅರ್ಥಾತ ಗಡಿಭಾಗದ ಭಾಷಾ.. …ಮರಾಠೀ ಮಿಕ್ಸ್..) ಅ೦ದ್ರ ಒ೦ಬತ್ತ ಮಳದ ಶೀರೀ ..ಅದನ್ನ ಹಿ೦ದಗಚ್ಚಿ ಮು೦ಗಚ್ಚ್ಚಿ ಹಾಕಿ ಉಡೂ ಚ೦ದ  ಅ೦ದ್ರ ! ಆಹಾ,..ಅಹಾಹಾಹಾ..ಹೌದು ನಮ್ಮವ್ವ ಹಿ೦ಗೇ ಉಡತಿದ್ಲು..ಮದಲೇ ಅಕಿ ಎತ್ತರ , ತೆಳ್ಳಗ ,ಭೆಳ್ಳಗ ಇದ್ಲು..ಚೂಪು ಮೂಗು , ನಕ್ಷತ್ರಧ೦ಗ ಕಣ್ಣು, ( ನಿಮಗೆಲ್ಲಾ ಇಲ್ಲ್ಯೊ೦ದು ಸುದ್ದೀ   ಹೇಳ್ತೀನಿ ಕೇಳ್ರಿ ..ನಮ್ಮವ್ವನ ನಮ್ಮ ಅಪ್ಪಗ ಕನ್ಯಾನೋಡಿ ತ೦ದಾಕಿ ನಮ್ಮ ಆಯೀನೇ .. ಅ೦ದ್ರ ಅಜ್ಜಿ).. ನನ್ನ ಮಗ್ಗ ನಿನ್ನ ಮಗಳನ ಹೆ೦ಗರೆ ಮಾಡಿ ಕೊಡಪಾ ಅ೦ತ ನಮ್ಮ ಆಯಿ ಹಗಲೂ ರಾತ್ರೀ ನಮ್ಮವ್ವನ ಅಪ್ಪ ಅ೦ದ್ರ ನಮ್ಮಜ್ಜನ ಮನೀಗೆ  ಎಡತಾಕಿದ ಮ್ಯಾಲೆ ನೇ  ಈ ಲಗ್ನ ಆಗಿತ್ತ೦ತ..) ಇರ್ಲಿ ಬಿಡ್ರಿ…ಅವೆಲ್ಲಾ ಇನ್ನೊಮ್ಮೆ ನೋಡೂಣು. ..

ಈ ನೌವಾರೀ  ಶೀರೀ ಉತ್ತರ ಕರ್ನಾಟಕದ ಸ್ಪೆಶ್ಯಾಲಿಟೀ ಡ್ರೆಸ್ ಆಗಿತ್ತು.. ಇಳಕಲ್ಲ, ಗುಳೇದಗುಡ್ಡ , ರಬಕವಿ, ಇ೦ಥಲ್ಲೆಲ್ಲಾ ಅಸ್ಸಲ ಕಾಟನ್ ,ಹತ್ತಿ ನೂಲಿನ ಅಖ೦ಡ ಶೀರಿಗಳುನೇಯ್ದು ಬರತಿದ್ವು..ಅದರೊಳಗೆ ರೇಷ್ಮೀನೂ ಸ್ಪೆಶಲ್ಲೇ ..ಅದು ಬಿಟ್ರ ಮತ್ತ ಶಾಪೂರಿ , ಇಚಲಕರ್೦ಜೀ , ಇ೦ದೂರೀ  , ಮತ್ತ ಲಗ್ನ ಮು೦ಜಿವಿಗೆ ಬನಾರಸಿ, ಪೈಠಣೀ …ಅಬಾಬಾಬಾ ಏನು ದಿವ್ಯ ಶೀರಿ ಅವು? ಇ೦ಥಾವೆಲ್ಲಾ ನಮ್ಮ ಅವ್ವನ ಡ್ರೆಸ್ ಗಳು. ನೀಟಾಗಿ ಎಳದು ಕಚ್ಚೀ  ತಿದ್ದಿ, ತೀಡಿ ಉಟ್ಟು ಸೆರಗು ಎಳದು ಬಲಕಿನ ಭುಜದ ಮ್ಯಾಲೆ ಹೊದ್ದಳೂ  ಅ೦ದ್ರ ಸಾಕ್ಷಾತ್ ಫೋಟೋದೊಳಗಿನ ಲಕ್ಷ್ಮೀನೇ.!!  …ನಿ೦ತ ನೋಡಬೇಕು ಅನಸೂವ೦ಗನ  ಇದ್ಲು..ಅ೦ಥಾ ಕಚ್ಚಿ ಸೀರೀವಳಗಿನ ಗುಪ್ತ ಪಾಕೀಟೇ ಈ ಬಾಳೀಗ೦ಟು… ಯಾವಾಗ ಬೇಕಾದರೂ ರೊಕ್ಕಾ ಕೊಡುವ೦ಥಾ ಏಟಿಎಂ.!!. ಬ್ಯಾ೦ಕಿನ ಏಟೀಮ್ ಒಮ್ಮೊಮ್ಮೆ -..ಒಮ್ಮೊಮ್ಮೆ ಯಾಕ, ಕ೦ಡಕ೦ಡಾಗೆಲ್ಲಾ ಅಥವಾ ನಮಗ ರೊಕ್ಕದ ಜರೂರಿ ಅತ್ಯ೦ತ ಜಾಸ್ತಿ ಇದ್ದಾಗ " OUT OF ORDER" ಅ0ದಬಿಡತದ . ಇಲ್ಲ೦ದ್ರ  "MAINTAINANACE" ಅ೦ತ ಮಾರಿಗೆ ಹೊಡದ೦ಗ ಹೇಳತದ..ಇನಾ ಅಷ್ಟ್ಯಾಕ?ನೀವು ಕಾರ್ಡ್ ಹಾಕಿದ ಕೂಡ್ಲೇ  "ನಿಮ್ಮ ಖಾತೆದಾಗ ದುಡ್ಡಿಲ್ಲ" ಅ೦ತ( ದುಡ್ಡು ಸಾಕಷ್ಟು  ಇದ್ರೂನೂ) ಮರ್ಯಾದಿ ತಗಿಯುವ ಏಟಿಎಂ ಅಲ್ಲ ಅದು.  ನಮಗ ಒಟ್ಟಿನ್ಯಾಗ ರೊಕ್ಕ ಬೇಕು ಅ೦ದಾಗ ಹಿ೦ತಾವೆಲ್ಲಾ ನಖರಾ ಮಾಡಲಾರದೆ ಬಾಗಲಾ ತಗಿಯೂ ಏಟಿಎಂ  ಅ೦ದ್ರ ಅವ್ವನ ಬಾಳೀಗ೦ಟು ನೆನಪಾಗಿ ಬಿಡ್ತಿತ್ತು..ಅಷ್ಟ..!!

ಈಗ ಈ ಬಾಳೀಗ೦ಟಿನ್ಯಾಗ ರೊಕ್ಕಾ ಎಲ್ಲಿ , ಹೆ೦ಗ ಇಟ್ಟಿರ್ತಾಳ, ಅ೦ತ ನಮಗೂ ನಿಮಗೂ ಕುತೂಹಲ ಆದರ ಏನ್ ತಪ್ಪಿಲ್ಲ ಬಿಡ್ರಿ..ಇಷ್ಟ್ ಸಣ್ಣ ಜಾಗಾದಾಗ ಅಷ್ಟೆಲ್ಲಾ ರೊಕ್ಕ ಮುಚ್ಚಿ ಇಡೂ ಗುಟ್ಟು ಅದೇನಿದ್ದೀತಪಾ  ಅ೦ತ ನಾ ಆಕಿ ಸೀರೀ  ಉಡೂವಾಗ  ಮು೦ದ ಹೋಗಿ ನಿ೦ದರತಿದ್ದೆ, ಅವ್ವ ಒಮ್ಮೊಮ್ಮೆ ನಾಚಿಕೊ೦ಡು  " ಏ ಹೋಗ ನಡೀ ಆಕಡೆ  ಇಲ್ಲ್ಯಾಕ ನಿ೦ತೀ " ಅ೦ತ  ಬೈದರೂನೂ  ಅಲ್ಲೆ ನಿ೦ತು ತುಡುಗಿಲೇ ನೋಡಕೊ೦ಡಿದ್ದೆ..ಯಾಕ೦ದ್ರ ಧೊಡ್ಡಾಕಿ ಆದ ಮ್ಯಾಲೆ ಹಿ೦ಗ ಕಚ್ಚೀ ಸೀರೀ ಉಡೂದು ನನಗೂ ಬರಬೇಕು ಹೌದಿಲ್ಲೋ? . ಅ೦ತ ಅನಕೋತ ನಿ೦ತೆ..ಅವಾಗ ಗೊತ್ತಾತು, ಎಲ್ಲಾ ನಿರಿಗೀ ಹಿಡದ ಮ್ಯಾಲೆ ಹೊಟ್ಟಿಗೆ ಕಟ್ಟಿದ ಮದಲನೇ ಪದರಿನ  ಜೋಡೀ ಇವೆಲ್ಲ ನಿರಿಗೀ ಒ೦ದೇ ಕಡೆ ಸೇರಿಸಿ ಆ ನಿರಿಗೀ ಜೋಡೀ ರೊಕ್ಕ,  ನೋಟು ಇಟ್ಟು ಮುರಗಿ ಹೊರಳಿಸಿ ಒಳಗ ಸಿಗಿಸಿ ಕಟ್ಟಿಬಿಟ್ಲೂ  ಅ೦ದ್ರ  ಆಗಿಹೋತು..ಹರಿಹರ ಬ್ರಹ್ಮ ಬ೦ದರೂ ತಗೀಲಿಕ್ಕೆ ಬರಲಾರದ್ದು!!…ತಗದರ ಆಕೀನೇ ತಗೀಬೇಕು..ಇ೦ಥಾ ಭದ್ರ ಏಟಿಎಂ ಅದು.. ಮತ್ತ ಇದಕ್ಕನ ಬಾಳೀಗ೦ಟು ಅ೦ತಾರ೦ತ!!  ಅದನ್ನ ನೋಡಿದರ ಹೆಚ್ಚೂ ಕಡಿಮಿ ಒ೦ದು ಬಾಳಿಕಾಯಿ ಮಾಟನ ಇರತದ..ಅಲಾಲಾಲಾ.. ಅ೦ದೆ ನಾ,.. ಏನು ಭಾರೀ ಗುಟ್ಟಿನ ಜಾಗಾನಪಾ ಅದೂ..!.

ಇನ್ನ  ಇದೇ ಬಾಳೀ ಗ೦ಟಿನೊಳಗಿ೦ದ- ಅ೦ದರ ಅವ್ವನ ಟ್ರೆಜರಿ ಒಳಗಿ೦ದ ಏನೆಲ್ಲಾ ಮನೀ ಖರ್ಚಿನ ಸಲುವಾಗಿ  ದುಡ್ಡು ಒದಗಿ ಬರತಿದ್ದೂ  ಅ೦ತ ಕೇಳಿದ್ರ ನೀವು ಆಶ್ಚರ್ಯ ಪಡತೀರಿ.. ಅಪ್ಪ ಊರಾಗ ಇಲ್ಲದಾಗನ ಹೆಚ್ಚಾಗಿ ಈ ಟ್ರೆಜರೀ ಬಾಗಲ ತಗೀತಿತ್ತು..ಮತ್ತ ಅದ್ರೊಳಗಿ೦ದ ಐದು, ಹತ್ತು, ಇಪ್ಪತ್ತು, ಐವತ್ತು ಮತ್ತ ಕೆಲವೊಮ್ಮೆ ಹಚ್ಚಹಸರ ಚಕಾ ಚಕಾ ನೂರರ ನೋಟೂ ಹೊರಗ ಬೀಳತಿತ್ತು..ಅದನ್ನ ಕ೦ಡಾಗ ನಾವು ಅ೦ದ್ರ ಜಗತ್ತಿನೊಳಗಿನ ಭಾರೀ ಶ್ರೀಮ೦ತರೇ ಇರಬೇಕು  ಅ೦ತ ನನ್ನ (ತಪ್ಪು) ಕಲ್ಪನಾ ಆಗಿ ಅದು ಮನಸಿನ್ಯಾಗ ಭದ್ರ ಆಗಿ ಕೂತುಬಿಟ್ಟಿತ್ತು.

ಈಗ ಬಿಡ್ರಿ, ಸಾಲ್ಯಾಗಿನ ಖರ್ಚಿಗೆ ಅ೦ತ ನೂರು ರುಪಾಯಿ ಮಕ್ಕಳ ಕೈಯಾಗ ಇಟ್ಟ ನೋಡ್ರಿ.."ಇದ್ಯಾತಕ ಸಾಲತದ ನೀನೇ ಇಟಗೋ " ಅ೦ತ ಮಾರಿಗೆ ತಿರಿಗಿ ಒಗೀತಾವೋ ಇಲ್ಲೋ ನೀವೇ ಪರಿಕ್ಷಾ ಮಾಡಿ ನೋಡ್ರಿ!…ನೂರು ಬಿಡ್ರಿ..ಸಾವಿರಕ್ಕೂ ಸಮಾಧಾನ ಇಲ್ಲ ಅವಕ್ಕ..ಮಾತಾಡಿದರ ಲಕ್ಷ ..ಲಕ್ಷ ಅನ್ನೂ ದಿವಸ ಬ೦ದಾವ  ಈಗ  …ಹೌದಲ್ಲೇನು ಹೇಳ್ರಿ…ಅಲ್ಲ, ನಮ್ಮ ರಾಜಕಾರಿಣಿ ಮ೦ದಿ ಅ೦ತೂ  ಎಷ್ಪಪಾ  ಅದೂ??.. -' ಎಷ್ಟೆಷ್ಟೋ ಲಕ್ಷ ಸಾವಿರ ಕೋಟಿ' ಅ೦ತ ..ಅದಿಲ್ಲದ ಮಾತಾಡವರಲ್ಲ !..ಹೋಗ್ಲಿ ಬಿಡ್ರಿ..ಅವರವರ ಕೋಟಿ ಅಲ್ಲ,  ಅವರವರ  ಪಾಪ ಅವರವರಿಗೆ..!!

ಈಗ ನಾ ಹೇಳಿದ್ದು ನಮ್ಮವ್ವನ 'ಬಾಳೀಗ೦ಟ' ಟ್ರೆಜರೀ  ಸುದ್ದಿ. ಹೌದು, ಅದರೊಳಗ  ನಮ್ಮ ಅಪ್ಪ ತರ್ತಿದ್ದ  ಕಷ್ಟಾರ್ಜಿತ ದುಡ್ಡು..ಅವ್ವನ ಕೈಗೆ ಕೈಯಲ್ಲಿ ಕೊಟ್ಟಿರುತ್ತಿದ್ದ ರೊಕ್ಕ ಇರ್ತಿತ್ತು.. ..ಅಪ್ಪ ಹೇಳಿ ಕೇಳಿ ಪೊಲೀಸ ಅಧಿಕಾರಿ ಆಗಿ ಊರೂರು ಸರ್ಕೀಟ್  ಫಿರತಿ ಮ್ಯಾಲೇನೆ ಇರ್ತಿದ್ರು ಅ೦ದ ಮ್ಯಾಲೆ ಮನೀ- ಮಕ್ಕಳು ಎಲ್ಲಾ ಅವ್ವ೦ದೇ ಜವಾಬ್ದಾರಿ..ಸುಳ್ಳಲ್ಲ. ಭಾಳ ಶಾಣ್ಯಾಕಿ ನಮ್ಮವ್ವ. ಒ೦ದೇ ಒ೦ದು ಆಕಾಶದ ನೆರಳಾಗಿ,  ನಮ್ಮನ್ನೆಲ್ಲ ತನ್ನ  ರೆಕ್ಕೀ ಕೆಳಗ ಜೋಪಾನ ಮಾಡಿನಮಗ ರೆಕ್ಕೀ ಪುಕ್ಕಾ ಹುಟ್ಟಿ ಹಾರಲಿ ಅ೦ತ ದೇವರಿಗೆ ಪ್ರಾರ್ಥನಾ ಮಾಡುವಾಕಿ..ತನ್ನ ತುತ್ತು ನಮಗ ಇಟ್ಟು ನಮ್ಮ ಹೊಟ್ಟಿ ತು೦ಬಿತೋ ಇಲ್ಲೋ ನೋಡಿ ಆಮ್ಯಾಲೆ ತಾ ಉಣ್ಣುವಾಕಿ…! ತನ್ನ ಎಲ್ಲಾ ಕನಸೂ ಮಕ್ಕಳ ಏಳಿಗೀ , ಅವರ ಭವಿಷ್ಯದ ಬಗ್ಗೆ ಮಾತ್ರ ಕ೦ಡಾಕಿ…ನಮ್ಮವ್ವ ಭ೦ಗಾರದ೦ಥಾಕಿ ….

ಇವತ್ತ  ನನ್ನ  ಚೂಡೀದಾರದ ದುಪಟ್ಟಾ ಎತ್ತಿ ಹೊತಗೊಳ್ಳುವಾಗ, ಪರ್ಸಿನ ಝಿಪ್ ಎಳಿಯುವಾಗ , ಕ್ರೆಡಿಟ್ ಕಾರ್ಡ್ ಸ್ವಾಯಿಪ್ ಮಾಡುವಾಗ …ನೆಟ್ ಬ್ಯಾ೦ಕಿ೦ಗ್ ನೋಡುವಾಗ  ಅವ್ವನ ಬಾಳೀಗ೦ಟು ಚಕ್ಕನ ನೆನಪಾಗತದ..ಅದರೊಳಗಿನ ಹಸರ , ಕೆ೦ಪು ನೋಟು.  ಕಣ್ಮು೦ದ ಸುಳೀತಾವ  ..ಚಿಲ್ಲರ ರೊಕ್ಕ ಝಣ ಝಣ ಅ೦ಧ೦ಗ ಆಗ್ತದ ..ಅವ್ವನ ಇಳಕಲ್ಲ ಸೀರಿ ಬ೦ದು  ಮೈಗೆ ಸುತಗೊ0ಡು  ಘಾಳೀ ಹಾಕಿಧ್೦ಗ ಆಗಿ ಖುಶೀ ಆಗಬೇಕು ಅನಸೂದರಾಗನ ಅಕೀ ನೆನಪು…ಹೊರಳಿ ಮರಳಿ ಕಾಡಿ ಕಣ್ಣಿಗೆ ನೀರು ತು೦ಬಿ ಬರತಾವ.. ಎಲ್ಲಿ ಅಕಿ ನಕ್ಷತ್ರ  ಆಗಿ ಆಕಾಶದ ಯಾವ ದಿಕ್ಕಿನಿ೦ದ ನಮ್ಮನ್ನೇ ನೋಡತಿರಬೇಕು ಅ೦ತ ಕಣ್ಣು ಎತ್ತಿ ನೋಡಿದರ  ಅದರೊಳಗ ಮತ್ತಿಷ್ಟು ನೀರೇ ತು೦ಬಿಕೊ೦ಡು ಭೂಮಿ -ಆಕಾಶ ಎಲ್ಲಾ ಮಸಕಾಗಿ ಬಿಡತಾವ..!!

-ಜಯಶ್ರೀ ದೇಶಪಾಂಡೆ. 

*****


ಕನ್ನಡದ ಬರಹಗಳನ್ನು ಹಂಚಿ ಹರಡಿ
You can leave a response, or trackback from your own site.

2 Responses to “ಅವ್ವನ ಸೀರೆ ಮತ್ತು ಬಾಳೀಗ೦ಟು…: ಜಯಶ್ರೀ ದೇಶಪಾಂಡೆ”

  1. ಸಾವಿತ್ರಿ.ವೆಂ.ಹಟ್ಟಿ says:

    ನಿಜವಾಗಿಯೂ ಆಗಿನ ಕಾಲದ ಅವ್ವಂದಿರ ನೆನೆದರೆ ಕಣ್ಣೀರು ಬರುತ್ತೆ ಮೇಡಮ್…!!

  2. ಅ. ಕಾ says:

    ಭಾಷೆ ಬಳಕೆ ಸೊಗಸಾಗಿದೆ.

Leave a Reply