Facebook

ಬುಲ್-ಬುಲ್ ಮಾತಾಡಕಿಲ್ವಾ!?: ಆದರ್ಶ ಸದಾನ೦ದ ಅರ್ಕಸಾಲಿ

Spread the love

ಇಲ್ಲಿಯವರೆಗೆ     

ಪಕ್ಷಿವೀಕ್ಷಣೆ ಭಾಗ-೪

"ಯಾಕ್ ಲೆ, ಬೆಳಿಗ್ಗೆ ಬೆಳಿಗ್ಗೆ ಫೋನ್ ಮಾಡಿಯಲ್ಲಾ !?"
"ಇವತ್ತ್ ಅಮವಾಸ್ಯ, ನೀನು ಸ್ನಾನ ಮಾಡಿ ಪ್ರೆಶ್ ಇರ್ತಿ ಅ೦ತ ಫೋನ್ ಮಾಡ್ದೆ!"
"ನಾವು ನಿನ್ನಗ೦ಲ್ಲ ಲೇ, ದಿನಾಲೂ ಜಳ್ಕಾ (ಸ್ನಾನ) ಮಾಡ್ತೀವಿ"
" ಗೊತ್ತೈತಿ ಬಿಡು, ಹಾಸ್ಟೆಲಿನ್ಯಾಗ ನೀ ಬರಿ ಹುಣ್ಣುಮೆ-ಅಮವಾಸ್ಯೆ ಲೆಕ್ಕಾಚಾರ ಹಾಕಿ ಸ್ನಾನ ಮಾಡವ !! ಆದ್ರೂ ..ಅದೇನು ಮಾರಾಯ, ಯಾವಗ್ ನೋಡಿದ್ರೂ ಪ್ರೇಶ್ ಇರ್ತಿದ್ದೆ . ಅದೇನ್ ಸೆಕ್ರೆಟ್ ಅ೦ತ ನಮ್ಗೂ ಹೇಳಲಾ? "
"ಲೇ ಸಾಕ್ ಮಾಡ್, ಏನರ್ ಹೊಸಾದ್ ಇದ್ರ ಹೇಳ್!! ಬೆಳಿಗ್ಗೆ ಬೆಳಿಗ್ಗೆ ನನ್ನ ಬಾತ್-ರೂಮ್ ಜಾತಕ ತಕ್ಕೊ೦ಡು ಕುತ್ಕೊಬ್ಯಾಡ್"
" ಹ೦ಗಲ್ಲಲೇ,…… ಸಿಟ್ ಮಾಡ್ಕೋಬ್ಯಾಡ, ಏನ೦ದ್ರ ನಿನ್ನೆ ನಾ ತೆಗೆದ 'ಬುಲ್-ಬುಲ್' ಹಕ್ಕಿ ಸ್ನಾನ ಮಾಡೋ ಫೋಟೋ ಗಳನ್ನು ನಿ೦ಗ ಈಮೇಲ್ ಮಾಡಿನಿ. ಟೈಮ್ ಇದ್ದಾಗ ನೋಡಿ, ಪೋಟೋಗಳ ಗುಣಮಟ್ಟದ ಬಗ್ಗೆ ನಿನ್ನ ಅಭಿಪ್ರಾಯ ಹೇಳು"….. 'ಸ೦ತ್ಯಾ' ನಿಗೆ ಅಮವಾಸ್ಯೆಯ ಬೆಳಿಗ್ಗೆ ಈ ರೀತಿಯ ವಿನಮ್ರತೆಯಿ೦ದ ಕೂಡಿದ ಬೇಡಿಕೆ ಇಟ್ಟಾಗ , ಅವನು ಖುಶಿಯಿ೦ದ ಒಪ್ಪಿಕೊ೦ಡ.

ನಾನು ಹೇಳಿದ್ದೆಲ್ಲ ನಿಜ, ಹಾಸ್ಟೆಲ್ಲಿನಲ್ಲಿ 'ಸ೦ತ್ಯಾ' ನ ಸ್ನಾನ ಮಾಡುವದನ್ನು ( ಅಕ್ಷರಷ: ತೆಗೆದುಕೊಳ್ಳಬೇಡಿ), ಹೋಗಲಿ ಸ್ನಾನಗೃಹದಿ೦ದ ಟಾವೆಲ್ ಸುತ್ತಿಕೊ೦ಡು ಹೊರಬರುವದನ್ನು ಯಾರು ನೋಡಿದ್ದಿಲ್ಲ. ಆದ್ರೂ ಯಾವಾಗ್ ನೋಡಿದ್ರೂ ಅವನು ಪ್ರೇಶ್ ಕಾಣಿಸಿತಿದ್ದುದ್ದಕೆ ವಿವಿಧ ದ೦ತಕಥೆಗಳಿದ್ದವು. ಕೆಲವರು ಪ್ರಕಾರ ಅವನು ಮಧ್ಯರಾತ್ರಿ ಎದ್ದು, ಸ್ನಾನ ಮಾಡಿ ಮತ್ತೆ ಮಲಗುತ್ತಿದ್ದನೆ೦ದು ( ಬೆಳಗಿನ ಬಾತ್-ರೂಮಿನ ಪಿಶ್ ಮಾರ್ಕೆಟ್ ಅವಸ್ತೆ ತಪ್ಪಿಸಿಕೊಳ್ಳಲು ) , ಇನ್ನು ಕೆಲವರ ಪ್ರಕಾರ, ಅವನಲ್ಲಿ ಬೆವರು ಬರಿಸುವ ಗ್ರ೦ಥಿಗಳು ಕಡಿಮೆ, ಅದಕ್ಕೆ ಬೆವರು ಬರದೆ ಪ್ರೆಶ್ ಕಾಣಿಸುತ್ತಾನೆ೦ದು ಮತ್ತು ಹಲವರ೦ತೂ ಇನ್ನೂ ಒ೦ದು ಹೆಜ್ಜೆ ಮು೦ದೆ ಹೋಗಿ , ಅವನು ಅ೦ದೇ೦ತದೋ 'ಚಿರಯೌವನ' ಬರಿಸೋ ಗಿಡಮೂಲಿಕೆಗಳ ರಾಸಾಯನ ಕದ್ದು ಕುಡಿಯುತ್ತಾನೆ೦ದು, ಅದೇ ಅವನ ಸೆಕ್ರೆಟ್ ಅ೦ತೆಲ್ಲಾ ಹಾಸ್ಟೆಲ್ ತು೦ಬೆಲ್ಲಾ ಮಾತಾಡಿಕೊ೦ಡಿರುತ್ತಿದ್ದರು. ನನಗೂ ಇವೆಲ್ಲ ಕೆಲವೊಮ್ಮೆ ನಿಜ ಅನ್ನಿಸಿದ್ದೂ ಇದೆ. ಈ ವಿಷಯ ಹಿಡಿದು, ಅವನನ್ನು ಕಾಡಿಸಿ ಬೇಡಿ ಕೇಳಿದರೂ, ಅವನು "ಬೇರೆಯವರಿಗೆ ಬುದ್ಧಿ ಇಲ್ಲ್ಲಾ, ಏನಾದ್ರೂ ಮಾತಾಡ್ತಾರ್ ಲೇ, ನಿ೦ಗರ ಸ್ವಲ್ಪ ಬುದ್ಧಿ ಐತಿ ಇಲ್ಲೋ!!? ಅ೦ತ ನನಗೇ ಪ್ರಶ್ನೆ ತಿರುಗಿಸಿ, ಬುದ್ಧಿವ೦ತಿಕೆಯಿ೦ದ ಜಾರಿಕೊಳ್ಳುತ್ತಿದ್ದ.

'ಸ೦ತ್ಯಾ'ನ ಬಾತ್-ರೂಮ್ ನಡುವಳಿಕೆಯೆಲ್ಲ ನೆನಪಾಗಿದ್ದು, ನಾ ತೆಗೆದ ಹಕ್ಕಿಗಳ ಸ್ನಾನದ ಚಿತ್ರಗಳನ್ನು ನೋಡುವಾಗ. ಸ್ನಾನಕ್ಕೆ ಅವು ಆಯ್ದಕೊ೦ಡ ಸ್ನಾನಗೃಹವೂ ವಿಶಿಷ್ಟವಾದುದು.

ಮನೆಯ ಮು೦ದಿನ ತೋಟದ ಬೇಲಿಯ ಹಿ೦ದೆ ಒ೦ದು ಅರ್ಧ ಕಡಿದ ತೆ೦ಗಿನ ಮರವೊ೦ದಿದೆ. ಅದು ಅರ್ಧ ಕಡಿದದ್ದೋ? ಇಲ್ಲ ರೋಗ ಬ೦ದು ಮೇಲ್ಬಾಗ ಕೊಳೆತು ಉದುರಿ ಬಿದ್ದಿದೋ? ಒಟ್ಟಿನಲಿ ಅದು ಉದ್ದನೆಯ ಮಲ್ಲಕ೦ಭದ೦ತೆ ಮನೆಯ ಮು೦ದೆ ಗಟ್ಟಿಯಾಗಿ ತಳಊರಿತ್ತು. ಅದರ ಬೊಡ್ಡೆಯ ಮೇಲ್ಬಾಗದಲ್ಲಿ, ಈ 'ಬುಲ್-ಬುಲ್' ಹಕ್ಕಿಗಳು ಅ೦ದು ಮದ್ಯಾಹ್ನದ ವೇಳೆಯಲ್ಲಿ ಬ೦ದು ಬರೀ ಕುಳಿತಿರಲಿಲ್ಲ. ಬೊಡ್ಡೆಯ ಮೇಲ್ಬಾಗದಲ್ಲಿ ಸ್ವಲ್ಪ ತೆಗ್ಗಿನ ಸ್ಥಳವಿದ್ದು, ಮಳೆ ನೀರು ಅಲ್ಲಿ ನಿ೦ತು, ಅಲ್ಲೊ೦ದು ಸ್ನಾನ-ಗೃಹ ನಿರ್ಮಿತವಾಗಿತ್ತು. ಬಿಸಿಲಲ್ಲಿ ಬಳಲಿದ ಹಕ್ಕಿಗಳ ನೀರಡಿಕೆಯನ್ನು ನೀಗಿಸುತ್ತದಲ್ಲದೇ, ಝಳದಲ್ಲಿ ಬೆ೦ದ ಪಕ್ಷಿಗಳಿಗೆ ಸ್ನಾನ ಮಾಡಲು ಈ ಪ್ರಕೃತಿ ನಿರ್ಮಿತ ಸ್ನಾನಗೃಹ ಅನುಕೂಲವಾಗಿತ್ತು. ಇದೊ೦ದು ಪ್ರಕೃತಿಯ ವಿಸ್ಮಯ. ನೂರಾರು ಮಹಡಿಯ ಕಟ್ಟಡದ ಮೇಲಿರುವ ಈಜುಗೊಳದ ಥರ. ಈ ಕೆಳಗಿನ ಚಿತ್ರಗಳಲ್ಲಿ ಬುಲ್-ಬುಲ್ ಹಕ್ಕಿಗಳು ನೀರಿನ ಸ್ನಾನ ಮಾಡಿ ನ೦ತರ ಸೂರ್ಯಸ್ನಾನ ಮಾಡುವ ಚಿತ್ರಗಳಿವೆ.

 

 

'ಬುಲ್-ಬುಲ್' ಹೆಸರೇ ವಿಶಿಷ್ಟವಾದುದು. ಇದನ್ನು ಭಾರತದಲ್ಲೂ ಹುಡುಗಿಯರಿಗೆ ಮಾತ್ರವಲ್ಲ, ಚಲನಚಿತ್ರಗಳಿಗೂ ಹೆಸರಿಡುತ್ತಾರೆ. ವರ್ಷದ ಹಿ೦ದೆ ಬಿಡುಗಡೆಯಾದ, ಚಾಲೆ೦ಜಿ೦ಗ್ ಸ್ಟಾರ ಅಭಿನಯದ 'ಬುಲ್-ಬುಲ್' , ನಿಮಗೆ ನೆನಪಿದೆಯೋ ಗೊತ್ತಿಲ್ಲ, ನನಗೆ ನೆನಪಿದೆ. ಇದರಲ್ಲಿರುವ ನಾಯಕ ನಾಯಕಿರ ಅಭಿಮಾನಕ್ಕಲ್ಲ, ಇದೊ೦ದು ರಿಮೇಕ್ ಚಿತ್ರವೆ೦ಬ ಹೆಮ್ಮೆಯಿ೦ದಲ್ಲ, ಅದರ ಹೆಸರಿನ ಅಡಿ ಶಿರ್ಷೀಕೆಯಲ್ಲಿ 'ಬುಲ್-ಬುಲ್ – ಮಾತಾಡಾಕಿಲ್ವ? ಅನ್ನೋ ತುಸು ತು೦ಟ ತುಸು ರೋಮ್ಯಾ೦ಟಿಕ್ ಪ್ರಶ್ನೆ ರೂಪದ ಸಬ್ ಟೈಟಲ್ . ಯಾಕೆ೦ದರೆ ಬುಲ್-ಬುಲ್ ಹಕ್ಕಿಗಳು ಅವುಗಳ ಹೆಸರು ಪಡೆದುದು, ಮುಖ್ಯವಾಗಿ ಹಾಡಿಗಾಗಿ, ಕಾಡು ಹರಟೆ ಇವುಗಳ ಎರಡನೆಯ ಹವ್ಯಾಸ ಇದ್ರೂ ಇರಬಹುದು. 'ಬುಲ್-ಬುಲ್ ಹೆಸರಿನ ಮೂಲ ಹುಡುಕುತ್ತಾ ಹೋದರೆ, ಇದು ಹಳೆಯ ಇರಾನ್ ಅ೦ದರೆ 'ಪರ್ಶಿಯಾ' ದೇಶದ ಕವಿತೆಗಳಲ್ಲಿ ತ೦ದು ನಿಲ್ಲಿಸುತ್ತದೆ. ಇಲ್ಲಿ, ಈ ಹಕ್ಕಿಗಳನ್ನು 'ಹಾಡು-ಹಕ್ಕಿ'ಗಳೆ೦ದು ಹೊಗಳಿ, ಇವುಗಳ ಹಾಡಿನ ಬಗ್ಗೆ ರಸಮಯ ಕವಿತೆಗಳನ್ನು ಬರೆಯಲಾಗಿದೆ, ಮಧುರವಾಗಿ ಹಾಡುವ ಪ್ರೇಯಸಿಯನ್ನು ಬುಲ್-ಬುಲ್ ಗಳಿಗೆ ಹೋಲಿಸಲಾಗಿದೆ . ಇದು ರಾತ್ರಿಯಲ್ಲಿ ಕಚೇರಿ ನಡೆಸಿ ಕೇಳುಗರನ್ನು ಮೋಡಿ ಮಾಡುವ 'ನೈಟಿ೦ಗಲ್' ಪಕ್ಷಿಗೆ ಹೋಲಿಸಲಾಗಿದೆ. ಬುಲ್-ಬುಲ್ ಮತ್ತು 'ನೈಟಿ೦ಗಲ್' ಬೇರೆ ಬೇರೆ ಪಕ್ಷಿಗಳು. ಆದರೆ ಕೆಲವೊ೦ದು ಶಭ್ದಕೋಶಗಳಲ್ಲಿ 'ನೈಟಿ೦ಗಲ್' ಗೆ 'ಬುಲ್-ಬುಲ್' ಅ೦ತ ಕರೆದಿದ್ದಾರೆ. ಹಾಲ೦ಡಿನ, ಡಿಸೈನರ್ ಗಡಿಯಾರಗಳ ಪ್ರಸಿದ್ಧ ಕ೦ಪನಿಯೊ೦ದು ತನ್ನ ಕೈಗಡಿಯಾರಗಳಿಗೆ 'ಬುಲ್-ಬುಲ್' ಹೆಸರು ಕೊಟ್ಟಿದೆ.

ಬುಲ್-ಬುಲ್ ಗಳನ್ನು 'ಹಾಡು-ಹಕ್ಕಿ'ಗಳ ಗು೦ಪಿಗೆ ಸೇರಿಸಿದ್ದಾರೆ ( passerine ) . Passerine ( Latin ನಲ್ಲಿ passer ಅ೦ದರೆ ಗುಬ್ಬಚ್ಚಿ) , ಇವುಗಳ ಮುಖ್ಯ ಲಕ್ಷಣ ಇವುಗಳ ಕಾಲ್ಬೆರಳುಗಳು ಕೊ೦ಬೆಯನ್ನು ಹಿಡಿಯಲು ಅನುಕೂಲವಾಗುವ೦ತೆ ವಿಕಸನ ಹೊ೦ದಿರುವ೦ತಹುಗಳು, ಅವಷ್ಟೇ ಅಲ್ಲ, ಅವುಗಳ ಧ್ವನಿ ಪೆಟ್ಟಿಗೆಯೂ ಎಲ್ಲ ಪಕ್ಷಿಗಳಿಗಿ೦ತ ಹೆಚ್ಚು ವಿಕಸನಗೊ೦ಡು ವಿವಿಧ ತರಹದ ಧ್ವನಿಗಳನ್ನು ಹೊರಡಿಸಲು ಅನಕೂಲ ಮಾಡಿಕೊಟ್ಟಿದೆ. ಸುಮಾರು ನಾಲ್ಕು ಸಾವಿರ ಗುಬ್ಬಚ್ಚಿ ಗಾತ್ರದ ಪಕ್ಷಿಗಳು ಈ ಗು೦ಪಿನಲ್ಲಿವೆ. ಗು೦ಪಿನ ಗ೦ಡುಗಳು ಮುಖ್ಯವಾಗಿ ಹಾಡುಗಾರರು, ಹೆಣ್ಣುಗಳ ಗಮನ ಸೆಳೆಯಲು ಎ೦ತೆ೦ತಹ ಕಚೇರಿಗಳನ್ನೂ ನಡೆಸಿಕೊಡಬಲ್ಲವು. ದೊಡ್ಡ ಕಚೇರಿಯಾದರೆ, ಅದಕ್ಕೆ ತಕ್ಕ೦ತೆ ಅಧಿಕ ಹೆಣ್ಣುಗಳು ಮರುಳಾಗುತ್ತವೆ. ಅದಕ್ಕಾಗಿಯೇ ಗ೦ಡುಗಳು, ವಿವಿಧ ತರಹದ ಹಾಡುಗಳನ್ನು ಶೃತಿಗೊಳಿಸಿ ತರತರದ ಪ್ರಯೋಗ ಮಾಡುತ್ತವೆ. ಪುಣ್ಯಕ್ಕೆ ಈ ತರಹದ ನಡುವಳಿಕೆ ಮಾನವರಲ್ಲಿ ಇಲ್ಲ, ಇಲ್ಲಾ೦ದ್ರೆ ದಿನ ಬೆಳಾಗುವದರೊಳಗೆ ಮನೆ ಮು೦ದೆ ಚಿಗುರುಮೀಸೆಯ ಹುಡುಗರು, ಬಲಿತ ಗ೦ಡುಗಳು, ತುಸು ವಯಸ್ಸಾದ ಗ೦ಡದಿರು ಹಾಡು ಹೇಳಿಕೊ೦ಡು ಹೆಣ್ಣುಗಳ ಮನ ಒಲೆಸುವ ಕಚೇರಿಗಳ ಹಾವಳಿ ಇರುತ್ತಿತ್ತು, ಇಲ್ಲಾ ರಾತ್ರಿ ಗು೦ಡು ಹಾಕಿ ಬೀದಿಯಲ್ಲೆಲ್ಲ ಸ೦ಗೀತ ಸಭೆಗಳ ದಾ೦ಧಲೆ ದಿನನಿತ್ಯ ನಡೆಯುತ್ತಿತ್ತು.

ಕಾಡಲ್ಲದೇ ನಾಡಿನಲ್ಲೂ ಕಾಣಬರುವ ಈ ಪಕ್ಷಿಗಳಲ್ಲಿ ನೂರಾಮುವತ್ತು ಬಗೆಯ ಪ್ರಭೇದಗಳಿವೆ. ಕಾಡಿನ ಬುಲ್-ಬುಲ್ ಹಸಿರು ಬಣ್ಣದ್ದಾಗಿದ್ದರೆ, ನಾಡಿನದು ಕ೦ದು ಇಲ್ಲಾ ಕರಿ ಬಣ್ಣದ್ದಾಗಿರುತ್ತದೆ. ಇವು ಸುಮಾರು 13 ಸೆ೦ಮಿ ನಿ೦ದ 29 ಸೆ೦ಮಿ ವರೆಗೆ ಉದ್ದವಾಗಿರುತ್ತವೆ. ಇವುಗಳ ಕತ್ತು ಸಣ್ಣದು ಮತ್ತು ತೆಳುವಾದದ್ದು. ಗರಿಗಳ ಬಾಲ ಉದ್ದದಾದರೂ ರೆಕ್ಕಗಳು ಸಣ್ಣವು ಮತ್ತು ಗೋಲಾಕಾರದವು. ಕೊಕ್ಕು ಸ್ವಲ್ಪ ಉದ್ದವಾಗಿ ಕೊನೆಗೆ ಮೊನಚಾಗಿರುತ್ತದೆ. ಗರಿಗಳು ತರತರದ ಬಣ್ಣದ್ದಾಗಿರಬಹುದು, ಜೊತೆಗೆ ಬಾಲದ ಅಡಿಬಾಗ ( vent ) ಕೆ೦ಪು, ಹಳದಿ ಇಲ್ಲಾ ಕೇಸರಿ ಬಣ್ಣದ್ದಾಗಿರುತ್ತದೆ. ನಾ ತೆಗೆದ ಚಿತ್ರದಲ್ಲಿರುವ ಬುಲ್-ಬುಲ್ ನ ಬಾಲದ ಅಡಿಬಾಗ ಕೆ೦ಪಾಗಿದ್ದು, ಅದರ ಹೆಸರು Red Vented Bulbul, ಸೂಕ್ಷ್ಮವಾಗಿ ನೋಡಿದರೆ, ಅದರ ಬಾಲದ ಅಡಿಯಲ್ಲಿ ಕೆ೦ಪು ಬಣ್ಣದ ತುಪ್ಪಳ ಕಾಣಬಹುದು. ಈ ತರಹದವುಗಳು ಭಾರತ,ಶ್ರೀಲ೦ಕಾ ಮತ್ತು ಬರ್ಮಾ ದೇಶಗಳಲ್ಲಿ ಹೆಚ್ಚಾಗಿ ಕಾಣಸಿಗುತ್ತವೆ.

ಈ ಬುಲ್-ಬುಲ್ ಗಳ ಚಿತ್ರ ತೆಗೆಯುವಾಗ, ಇವು ತೆ೦ಗಿನ ಬೊಡ್ಡೆಯ ಮೇಲೆ ಏನು ಮಾಡುತ್ತಿದ್ದವು ಎ೦ದು ಆ ಗಳಿಗೆಯಲ್ಲಿ ಸ್ಪಷ್ಟವಾಗಿರಲಿಲ್ಲ, ಫೋಟೊಗಳನ್ನು ಕ೦ಪ್ಯೂಟರಿಗೆ ಹಸ್ತಾ೦ತರಿಸಿ ನೋಡುವಾಗ , ಇವುಗಳ 'ಲಿರಿಲ್ ಸೋಪಿನ' ಜಾಹಿರಾತು ನೆನಪಿಸುವ, ಸ್ನಾನಮಾಡುವ ನೋಟ ಕಣ್ಣು ಮು೦ದೆ ಇತ್ತು. ಬರಿ ಸ್ನಾನ ಮಾತ್ರ ಅಲ್ಲ ನ೦ತರ ಬಿಸಿಲನಲ್ಲಿ ತಮ್ಮ ರೆಕ್ಕೆಗಳನ್ನು ಒಣಗಿಸಿಕೊಳ್ಳುವುದು ಮತ್ತು ಸೂರ್ಯಸ್ನಾನ ಮಾಡುವ ನೋಟಗಳು ಕ್ಯಾಮೆರದಲ್ಲಿ ಸೆರೆಯಾಗಿದ್ದವು.

ಅಷ್ಟಕ್ಕೂ ಈ ಹಕ್ಕಿಗಳು ಯಾಕೆ ಸ್ನಾನ ಮಾಡಬೇಕು ? ಸ್ನಾನ ಮಾಡದೇ ಬರೀ ಡಿಓಡೆರ೦ಟ್ ಹಾಕಿಕೊ೦ಡರೆ ಸಾಲದಾ ? ಸೂರ್ಯಸ್ನಾನದಿ೦ದಾಗುವ ಪ್ರಯೋಜನಗಳೇನು ? ಒ೦ದೊ೦ದಾಗಿ ಪ್ರಶ್ನೆಗಳು ತಲೆ ತಿನ್ನತೊಡಗಿದವು.

ಹಲವಾರು ಹಕ್ಕಿ ಗಳು ದಿನ ನಿತ್ಯ ತಪ್ಪದೇ ಸ್ನಾನಮಾಡುತ್ತವೆಯೆ೦ದರೆ ನಿಮಗೆ ಆಶ್ಚರ್ಯವಾಗಬಹುದು. ದಿನದಲ್ಲೇ ನಾಲ್ಕೈದು ಬಾರಿ ಸ್ನಾನ ಮಾಡುವ ಹಕ್ಕಿಗಳೂ ಇವೆ. ಇದರಿ೦ದ ರೆಕ್ಕೆಗಳ ನಾಜೂಕು ಜೋಡಣೆಯನ್ನು ಉತ್ತಮ ಸ್ಥಿತಿಯಲ್ಲಿರಲು ಅನುಕೂಲವಾಗುವುದಲ್ಲದೇ ಜೊತೆಗೆ ಅದರಡಿ ಸೇರಿಕೊ೦ಡ ಧೂಳು,ಕ್ರಿಮಿ-ಕೀಟಗಳನ್ನು ಹೊರದೂಡಲು ನೆರವಾಗುತ್ತದೆ. ಸ್ನಾನದ ನ೦ತರ ಕೆಲವು ಹಕ್ಕಿಗಳು ತಮ್ಮ ಬಾಲದ ಅಡಿಯಲ್ಲಿರುವ ಗ್ರ೦ಥಿಯಿ೦ದ ಒ೦ದು ತರಹದ ಜಲಾಭೇದ್ಯ ( waterproof ) ತೈಲವೊ೦ದನ್ನು ಸ್ರವಿಸಿ ಗರಿಗಳನ್ನು ಸ೦ರಕ್ಷಿಸುತ್ತವೆ. ಈ ತರಹದ ಗ್ರ೦ಥಿಯಿರದ ಪಕ್ಷಿಗಳ ಗರಿಗಳು ತು೦ಬಾ ಮೃದು, ಜೊತೆಗೆ ಇವೊ೦ದು ತರಹದ ಶುಭ್ರವಾದ ಪುಡಿಯೊ೦ದನ್ನು ಉತ್ಪಾದಿಸಿ ಗರಿಗಳನ್ನು ರಕ್ಷಿಸುತ್ತವೆ, ಗಿಣಿ ಮತ್ತು ಕೆಲವೊ೦ದು ಹದ್ದುಗಳು ಈ ತರಹದಕ್ಕೆ ಉದಾಹರಣೆಗಳು. ನೀರು ವಿರಳವಾದ ಸ್ಥಳಗಳಲ್ಲಿ ಪಕ್ಶಿಗಳು ಮಣ್ಣು ಇಲ್ಲಾ ಉಸುಕಿನಿ೦ದ ಸ್ನಾನ ಮಾಡಿ ಗರಿಗಳಡಿಯಲ್ಲಿರುವ ಕ್ರಿಮಿ-ಕೀಟಗಳನ್ನು ತೆಗೆಯುತ್ತವೆ.

ಸ್ನಾನದ ನ೦ತರ ಗರಿಗಳನ್ನೆಲ್ಲ ಹರಡಿ ಬಿಸಿಲು ಕಾಯಿಸಿಕೊಳ್ಳುತ್ತವೆ, ಇದರಿ೦ದಾಗುವ ಲಾಭವೆ೦ದರೆ , ಬಾಲದ ಅಡಿಯ ಗ್ರ೦ಥಿಯಿ೦ದ ಸ್ರವಿಸುವ ಜಲಾಭೇಧ್ಯ ತೈಲ ಗರಿಗಳ ಮೇಲೆ ಸಮನಾಗಿ ಹರಡುತ್ತದೆ ಅದಲ್ಲದೆ, ಸೂರ್ಯನ ಶಾಖಕ್ಕೆ ಕ್ರಿಮಿ-ಕೀಟಗಳು ಹೊರಬರುತ್ತವೆ. ಕೆಲವೊ೦ದು ಪಕ್ಷಿಗಳು ಸರಿ ಸುಮಾರು ಹತ್ತು ನಿಮಿಷದಿ೦ದ ಮುಕ್ಕಾಲು ಘ೦ಟೆಯ ವರೆಗೂ ಈ ರೀತಿ ಸೂರ್ಯಸ್ನಾನ ಮಾಡುವುದು೦ಟು.

ಬುಲ್-ಬುಲ್ ಗಳಿಗೆ ಕನ್ನಡದಲ್ಲಿ ಪಿಕಳಾರ ಅ೦ತ ಹೆಸರಿದ್ರೂ, ಬುಲ್-ಬುಲ್ ಅ೦ತ ಕರೆಯುವದರಲ್ಲಿ ಒ೦ಥರಾ ರೋಮ್ಯಾ೦ಟಿಸಮ್ ಇದೆ. ಪ್ರೀತಿ ಹೆಚ್ಚಾದಾಗ ಪ್ರೇಯಸಿಗೋ ಇಲ್ಲಾ ಹೆ೦ಡತಿಗೋ ಬುಲ್-ಬುಲ್ ಅ೦ತ ಕರೆದು ನೋಡಿ, ಸಕಾರಾತ್ಮಕ ಪರಿಣಾಮ ಬೀರುತ್ತದೆ೦ದು 'ಸ೦ತ್ಯಾ'ನ ಅಭಿಪ್ರಾಯ. ಬುಲ್-ಬುಲ್ ಗಳ ಮಾತಾಯಿತು ಹಾಡಾಯಿತು, ಒ೦ದು ಪ್ರಶ್ನೆಗೆ ಮಾತ್ರ ಉತ್ತರ ಸಿಗಲಿಲ್ಲ , 'ರೋಟಿ' ಚಲನಚಿತ್ರದಲ್ಲಿ ರಾಜೇಶ್ ಖನ್ನಾ ಹಾಡುವ 'ನಾಚ್ ಮೇರಿ ಬುಲ್-ಬುಲ್ ಕಿ ಪೈಸಾ ಮಿಲೆಗಾ' ಗೆ ಯಾವ ತರಹದ ನರ್ತಿಸುವ ಬುಲ್-ಬುಲ್ ಸ್ಪೂರ್ತಿಯಾಯಿತೆ೦ದು ತಿಳಿದು ಬ೦ದಿಲ್ಲ.

*****

You can leave a response, or trackback from your own site.

6 Responses to “ಬುಲ್-ಬುಲ್ ಮಾತಾಡಕಿಲ್ವಾ!?: ಆದರ್ಶ ಸದಾನ೦ದ ಅರ್ಕಸಾಲಿ”

  1. Anil Paed Surg says:

    Super Aadhya

    • adarsh says:

      ಥ್ಯಾ೦ಕ್ಸ್ ಲೇ … ಅಷ್ಟು  ಬ್ಯೂಸಿ ಕೆಲಸದಾಗ ಬಿಡುವು ಮಾಡ್ಕೋ೦ಡು ಓದ್ತೀಯಲ್ಲಾ…ಅದ ಖುಷಿ ನೋಡು ನಮಗ

  2. narayan babanagar says:

    nice

  3. DR KIRAN PETKAR says:

    ಮಾಹಿತಿ ಮತ್ತು ಮನರ೦ಜನೆಯ ಮಜಕೂರ ಮಿಶ್ರಣ. ಮತ್ತಷ್ಟು ಬರಲಿ.

    • adarsh says:

      ಕಿರಣ್ … ಥ್ಯಾ೦ಕ್ಸ್ ಪಾ…ಲೇಖನ ಓದಿ ಮೆಚ್ಚಿದ್ದಕ್ಕೆ.

Leave a Reply